Цэнтрам свята сталі людзі. З вялікай і малой сцэны гучала мноства шчырых слоў падзякі і віншаванняў. Але самымі ганаровымі гасцямі, да каго была звернута асаблівая, цёплая ўвага, сталі ветэраны фабрыкі і тыя, хто верай і праўдай дзесяцігоддзямі аддаваў усяго сябе на карысць роднага прадпрыемства. Менавіта іх рукамі на працягу доўгіх гадоў стваралася слава «Чырвонага харчовіка», якая дазволіла яму па праве насіць званне зефірнай сталіцы Беларусі.
Кульмінацыяй дня стала ўзнагароджанне. Дыпломы, кветкі і падарункі ад запрошаных партнёраў і высокіх гасцей знайшлі сваіх герояў — тых, чыя штодзённая праца складае аснову поспеху прадпрыемства. Моманты ўручэння ўзнагарод на вялікай сцэне змяняліся словамі шчырай удзячнасці тых, хто прыняў фабрыку ў самым росквіце сіл. Менавіта дзякуючы самаадданай працы многіх пакаленняў і тых, хто працуе на прадпрыемстве сёння, «Чырвоны харчовік» стаў адной з асноў дабрабыту Беларусі!
У сваёй прамове дырэктар фабрыкі Ігар Мікалаевіч Кісель падкрэсліў вялікую важнасць гэтай даты. Ён адзначыў, што 155 гадоў — гэта не проста лічба, а гісторыя, напісаная працай пакаленняў. Самым галоўным здабыткам «Чырвонага харчовіка» былі і застаюцца людзі, якія ўсе гэтыя гады сваёй стараннасцю, адданасцю і майстэрствам прывялі прадпрыемства да таго высокага ўзроўню, на якім яно знаходзіцца сёння.
Свята завяршылася, пакінуўшы пасля сябе не толькі прыемныя ўспаміны, але і мноства памятных фатаграфій, якія надоўга захаваюць цяпло гэтага юбілейнага дня.
