Падрыхтоўка да падарожжа ці камандзіроўкі Загадзя да ад’езду звярніцеся да ўрача ў паліклініку па месцы жыхарства для: атрымання медыцынскіх рэкамендацый па знаходжанні за мяжой; правядзення неабходных прафілактычных прышчэпак. Вазьміце з сабой лекавыя прэпараты, якія вы прымаеце пастаянна і якія могуць спатрэбіцца вам пры розных недамаганнях.
Рэкамендацыі па вакцынацыі: Неабходна загадзя ўдакладніць у турыстычнай фірме ці пасольстве патрабаванні, якія прад’яўляюцца канкрэтнай краінай да вакцынацыі падарожнікаў. Пры выездзе ў краіны, небяспечныя па жоўтай ліхаманцы (краіны Афрыкі і Паўднёвай Амерыкі), неабходна зрабіць прафілактычную прышчэпку і атрымаць міжнароднае пасведчанне аб вакцынацыі супраць жоўтай ліхаманкі ва ўстанове аховы здароўя. Для падарожжа ў краіны Афрыкі і Паўднёва-Усходняй Азіі мэтазгодныя прышчэпкі супраць гепатытаў А і В. Выязджаючы ў краіны, небяспечныя па малярыі, Вам неабходна атрымаць рэкамендацыі ў свайго ўрача аб прафілактычных супрацьмалярыйных лекавых прэпаратах і спосабах іх прымянення.
Парады падчас падарожжа: Выконвайце элементарныя правілы асабістай гігіены. Як мага часцей мыйце рукі (абавязкова перад ежай і прыгатаваннем ежы, пасля наведвання туалета, грамадскіх месцаў), выкарыстоўвайце антысептык для рук, гігіенічныя сурвэткі. Ужывайце для піцця толькі бутыляваную ваду прамысловай вытворчасці альбо кіпячоную. Ужывайце ў ежу прадукты, у якасці якіх вы ўпэўненыя. Пазбягайце выпадковых аб’ектаў грамадскага харчавання, харчавання з латкоў, ніколі не спрабуйце і не набывайце ежу з рук на рынках і ў выпадковых гандляроў. Рыбу і іншыя прадукты мора ўжывайце толькі дастаткова тэрмічна апрацаванымі. Садавіну перад ежай старанна мыйце бяспечнай вадой (кіпячонай ці бутыляванай), перад ужываннем пажадана ачысціць іх ад лупіны. Выконвайце правілы гігіены пры прыгатаванні ежы. Выконвайце ўмовы і тэрміны захоўвання хуткапсавальных прадуктаў. Не ўжывайце прадукты з мінулым тэрмінам прыдатнасці. Не хадзіце басанож, каб не заразіцца лічынкамі.
